Заев: Има приближување во три, од седумте точки во преговорите за името

0
138

Од првичните седум појдовни позиции во преговарачкиот процес за решавање на спорот за името, приближување во ставовите има во три од нив, изјави премиерот Зоран Заев, одговарајќи на новинарски прашања за време на денешната посета на Неготино.

Тој рече дека со вчерашната средба на шефовите на дипломатиите на Македонија и на Грција, Никола Димитров и Никос Коѕиас, на која присуствуваше и медијаторот на Обединетите нации, Метју Нимиц, всушност почнал преговарачкиот процес, а сè досега било презентирање на позиициите на двете страни.

– Медијаторот Нимиц го води процесот, тој ги знае работите што може и што не може да поминат. Мене ми е драго што се разглобени сите отворени прашања. Ако тргнеме од некои седум позиции коишто беа појдовни точки на разговорите, знам дека тоа е веќе намалено на четири, значи три се отстранети – рече Заев.

Тој рече оти „веројатно тие беа најлесните точки“, но, дека тоа е охрабрувачки сигнал за двете страни дека е можно да се дојде до решение.

– Секако, суштинските позиции се многу значајни, името, уставот дали ќе се менува или не, јазикот и други работи кои таму се споменуваа. Тоа е суштината на самиот преговарачки процес и можноста за изнаоѓање на решение – изјави Заев.

Тој истакна дека останува на ставот оти нема потреба од интервенции во Уставот и дека добро се знае до каде може да се направат отстапки, а дека доколку се дојде до решение, граѓаните ќе го имаат последниот збор на референдум.

Заев потврди дека име со географска одредница е прифатлива опција за македонската страна и потсети дека се споменуваат неколку имиња.

– Тоа значи за нас е прифатливо име со географска одредница, односно ги отклонуваме сите други кои беа временска одредница, или некои други укажувања кои беа како предлози – рече Заев.

Извор: Мета.мк

Коментирај