Силјановска: Ова цунами на политичко самоволие какво што досега не сме виделе резултира со правна несигурност, селективна правда и внесување страв кај судиите

0
241

Кандидатот за претседател на Република Македонија од редовите на ВМРО-ДПМНЕ, професорката Гордана Силјановска Давкова се огласи во контекст на најновите случувања во правосудниот систем, правните експерти и новинарите кои зборуваат за „политичка поплава“.

-Јас би рекла дека е ова цунами на политичко самоволие какво што досега не сме виделе, а кое резултира со правна несигурност, селективна правда, внесување страв кај судиите кои не постапуваат според законот, туку за да избегнат јавен линч и политичка осуда, дуваат и на јогурт и така ги кршат правата на обвинетите и ги дискриминираат, истакнува Силјановска.

Професорката Силјановска Давкова ги нагласи небезбедноста на притворените, играњето „пинг-понг“ со мерката притвор, амнестирање на повеќе од половина обвинети и драконските казни кои се очекуваат за останатите поврзани со настаните од 27-ми април.

-Доста е веќе со повикување на „виши цели“ отворање на патот кон НАТО и ЕУ, и оправдување на партизацијата на законодавната власт со наметнување на самоволие од страна на владата. Секоја критика на ова што ни се случува пред очи и натаму се дискредитира и замолчува со наводна „одбрана на криминалот и на фамилијата“, потенцира таа.

Професорката Силјановска упати повик до колегите од правните факултети, адвокатската комора, НВО кои се занимаваат со правосудниот систем и човековите права, но и сите граѓани да се ослободат од стегите на стравот и политичката коректност и нештата да ги наречат со вистинското име: политичко самоволие и страховлада!

-Уставниот суд мора под итно да почне да ги решава ургентните предмети кои се однесуваат на човековите права, без да калкулира и да ги остава „жешките костени“ за Собранието, нагласи професорката и кандидат за претседател Гордана Силјановска Давкова.

Извор:kurir.mk

Коментирај