СДСМ и Заев сакаат да го помножат со нула ставот на скоро 1,2 милиони граѓани кои се против договорот со Грција

0
214

Покрај тоа што го прекрши ветувањето дека ќе си замине од функцијата премиер на Република Македонија доколку референдумот не успее, Зоран Заев и партијата на која е лидер сакаат да го помножат со нула противењето на околу 1,2 милиони граѓани против договорот. За претседателот на Владата и СДСМ не се важни оние кои својот став против договорот со Грција го искажаа преку бојкотирање на референдумот.

Имено, во избирачкиот список се запишани 1.806.336 гласачи, од кои на референдумот излегоа 666.344, а за гласаа 609.427 гласачи. Како што кажа премиерот Зоран Заев, треба да се почитува волјата на оние кои гласале „ЗА“ на референдумот, што значи дека точно 1.196.939 гласачи, кои преку неизлегување на референдумот или гласање против го искажаа својот став, не се важни.

-Народот направи многу важен избор. Сега кога имаме мнозинска изразена волја за европска Македонија, време е пратениците да го следат гласот на мнозинството за да обезбедиме подобра иднина, рече Заев и им се заблагодари на граѓаните кои излегоа да гласаат „за“ и „против“, сметајќи помножувајќи го со нула најголемиот дел од народот кој го бојкотираше овој неуспешен референдум.

Инаку премиерот на Република Македонија, Зоран Заев најави оставка доколку референдумот не успее.

-Како премиер имам мандат до декември 2020-та година. Ако падне референдумот и не успее, веројатно завршуваме ние со политиките овде, рече Заев на 31 август оваа година.

Во друга прилика, потврди дека ќе си замине бидејќи беше сигурен дека ќе има успешен референдум.

-Јас сум толку сигурен дека ќе успее референдумот во Република Македонија, што одговорот е ДА, ќе заминам. Ако не успее референдумот во Република Македонија, тоа значи дека едни од најсериозните гаранции за иднината на мојата земја јас не сум успеал да ги постигнам, убедувајќи го мнозинството од овој народ, рече Заев на 25 јуни оваа година.

Инаку, референдумот беше неуспешен поради тоа не се обезбеди цензус, излезноста беше 36.89 проценти или 666.344 гласачи, што е многу помалку од законски пропишаните 50 проценти плус еден гласач или 903.184 излезени гласачи.

Извор:kurir.mk

Коментирај