Место затворска казна, Македонец доби 500 франка од Швајцарија

0
810

Колку некогаш знаат да бидат чудни патиштата на (не)правдата зборува примерот од Швајцарија со доселеник од Македонија, кој наместо драконски да биде казнет за напад со нож и за серија сообраќајни прекршоци – добил отштета од 500 франка.

Во април 2015 година македонскиот мигрант со речиси 25-годишен престој во Швајцарија со забранет нож нанел расекотина во ноќна тепачка со четворица учесници, од кои еден ги навредил неговата бремена жена и децата. По сослушувањето од полицијата, таа го прегледала неговиот мобилен телефон со надеж дека обвинетиот ја снимил тепачката и така ќе го расветли случајот, но открила неколку видеа што покажале дека тој неколку пати ги прекршил сообраќајните правила и прописи. Во едно од видеата човекот возел низ градот Бриг со 120 км/ч во зона со дозволени 50 км/ч, а во друго се снимал додека „летал“ со 210 км/ч надвор од градот додека на совозачкото место седело дете, и тоа без врзан појас.

Одбраната побарала ослободување, барајќи видеата да не бидат земени предвид како доказ, а обвинителот побарал 20 месеци затвор за 37-годишникот. Окружниот суд од Бриг решил видеата делумно да се користат во процесот, за на крајот да го ослободи возачот за прекршокот со детето, бидејќи од снимката било нејасно дали обвинетиот е зад воланот и дали видеото е направено во Швајцарија или во Македонија со вујкото на малиот, како што тврдел тој. Од Судот го отфрлиле и обвинението за пребрзо возење, бидејќи од снимката не било јасно дали навистина возел во зона до 50 км/ч.

Судот, конечно, го прогласил виновен македонскиот доселеник за неколку сообраќајни прекршоци, за обичен физички напад и за прекршок на законот за оружје. Пресудата за сето тоа била условна казна затвор од 18 месеци ако во следните четири години повтори некое од делата, плус глоба од 220 франци, а кантонот Валис му исплатил отштета од 500 франци за ослободителните пресуди.

Сепак, човекот од Македонија ќе мора да ги покрие трошоците за кривично гонење од 3.000 франци и да плати уште 1.000 франка за судски трошоци.

Извор: Експрес

Коментирај